Rafinya nega zaxirada qoldirilgan edi?

Braziliyalik hujumchi Rafinya kutilmaganda zaxirada qolganiga eng yaxshi tarzda javob qaytardi – “Barselona“ning “Valensiya“ga qarshi g‘alabali o‘yinida (6:0) ikkinchi bo‘limda dubl qayd etdi.

Ispaniya ommaviy axborot vositalari xabariga ko‘ra, murabbiy Xansi Flik Rafinyani o‘yinoldi faollashtirish mashg‘ulotiga kechikib kelgani uchun zaxirada qoldirgan. Hujumning o‘ng qanotida debyutant Runi Bargji maydonga tushdi, ammo tanaffusdan so‘ng aynan Rafinya shvedni almashtirdi va o‘yinning asosiy figurasiga aylandi.

Flik matbuot anjumanida futbolchining kayfiyatiga e’tirozi yo‘qligini ta’kidladi:

“U terma jamoadan qaytgach, yaxshi mashg‘ulot o‘tkazdi. Uning ishga munosabati a’lo darajada, u o‘rganishni va jamoa uchun o‘ynashni xohlaydi. Bugun u chiqib, to‘g‘ri kayfiyat namoyish etdi.”

Hisob birinchi bo‘limdayoq Fermin Lopesning sa’y-harakatlari bilan ochildi, u keyinchalik dubl qayd etdi va Ispaniyaning eng yorqin yosh futbolchilaridan biri ekanligini tasdiqladi. Rafinya Markus Reshfordning uzatmasini 2:0 hisobida golga aylantirdi va bir necha daqiqadan so‘ng ikkinchi to‘pni kiritib, hisobni yirik ko‘rinishga keltirdi.

Shundan so‘ng Robert Levandovski o‘zini ko‘rsatdi: polshalik hujumchi mavsumda ilk bor ikki marta raqib darvozasini ishg‘ol qildi, ikkinchi golni esa Mark Bernalning uzatmasidan so‘ng kiritdi. 18 yoshli yarimhimoyachi uchun bu o‘ziga xos kecha bo‘ldi – u xochsimon paylaridan olgan og‘ir jarohatidan 383 kun o‘tib maydonga qaytdi. Estadi Yoxan Kroyff tribunalari uni gulduros qarsaklar bilan kutib oldi.

Flik yosh futbolchining qaytishi muhimligini ta’kidladi:

“Bernal yil bo‘yi tinimsiz mehnat qildi. Uning qaytishi o‘zi uchun ham, klub uchun ham, muxlislar uchun ham quvonch. Biz hammamiz u uchun xursandmiz.”

“Valensiya” ustidan qozonilgan g‘alaba “Barselona“ga 12 imkoniyatdan 10 ochko keltirdi va jadvalning yuqori qismidagi o‘rnini mustahkamladi. Kataloniyaliklarni oldinda yangi sinov kutmoqda – Chempionlar Ligasini “Nyukasl Yunayted” mehmoni sifatida boshlash.