Barselona Holand transfriga ishonadi

Ispan matbuoti xabar qilishicha, “Barselona” prezidenti Joan Laporta “Manchester Siti” hujumchisi Erling Holandni jamoasiga qo‘shib olish g‘oyasiga jiddiy kirishgan. Kataloniya klubi yaqinda 25 yoshga to‘lgan norvegiyalik futbolchi kelajakda albatta La Ligaga o‘tishiga ishonch bildirmoqda.

Hozircha “Barselona” futbolchi atrofidagi vaziyatni sinchkovlik bilan kuzatib bormoqda, Laporta esa Holand transferini yaqin yillardagi asosiy strategik loyiha sifatida ko‘rmoqda.

Shu bilan birga, Yevropaning boshqa nufuzli klublari ham transfer bozorida faol harakat qilmoqda. “Manchester Siti” kelasi yozda shartnomasi tugaydigan “Kristal Pelas” himoyachisi Mark Geyni o‘z safiga qo‘shib olish uchun “Liverpul” bilan raqobatlashishga tayyor. Futbolchiga Angliyaning boshqa jamoalari ham qiziqish bildirmoqda, biroq hozircha aynan ikki ulkan klub ingliz futbolchisi uchun kurashda peshqadam hisoblanmoqda.

“Everton” esa 2026 yilning yozida bo‘lishi mumkin bo‘lgan takliflarga qaramay, himoyachi Jarrad Brantveytni jamoasida saqlab qolishga intilmoqda. Klub uni uzoq muddatli loyihaning bir qismi deb biladi va sotish haqida o‘ylamoqchi emas.

“Arsenal“, “Chelsi“, “Manchester Yunayted“, “Barselona” va “Real” kabi yetakchi klublarning skautlari “Ayaks“ning 17 yoshli belgiyalik iste’dodli futbolchisi Yorti Mokio rivojlanishini kuzatmoqda. Yosh yarim himoyachi allaqachon Yevropada jiddiy e’tibor qozongan.

“Kristal Pelas” yarim himoyachisi Adam Uortonga ham alohida e’tibor qaratilmoqda. 21 yoshli ingliz “Liverpul“ga o‘tishni xohlamoqda, ammo unga “Real“, “Chelsi” va “MYU” klublari ham qiziqish bildirmoqda.

Portugaliyada ham transfer bo‘yicha vaziyat qizg‘in: “Benfika” prezidentligiga nomzod Krishtovu Karvalyu agar g‘alaba qozonsa, Bruno Lajeni iste’foga chiqarishini va bosh murabbiy lavozimiga Yurgen Kloppni taklif qilishga harakat qilishini aytdi. Boshqa nomzod Joau Noronya Lopesh esa aksincha, “Manchester Yunayted“ning hozirgi bosh murabbiyi Ruben Amorimni Lissabonga qaytarishni orzu qilmoqda.