Chempionlar Ligasida porlashi kutilayotgan o’smirlar

Chempionlar ligasining yangi mavsumi shu hafta boshlanadi va muxlislar e’tibori nafaqat mashhur yulduzlarga, balki Yevropaning asosiy maydonida o‘zini ko‘rsatishga tayyor bo‘lgan yosh iste’dodlarga ham qaratilgan.

Ular orasida “Yuventus” yarim himoyachisi Vasiliye Ajich ham bor. U 19 yoshida Chernogoriya terma jamoasi uchun gol urib debyut qilgan va o‘z avlodining eng istiqbolli futbolchilaridan biri hisoblanadi. Dortmundning “Borussiya” jamoasida Judning ukasi Job Bellingem to‘p suradi. U Bundesligada tez sur’atlar bilan rivojlanmoqda va allaqachon moslashmoqda.

Ayniqsa, “Manchester Siti“dan “Bayer“ga ijaraga olingan argentinalik Klaudio Echeverri e’tiborni tortmoqda. U allaqachon Klublar jahon chempionatida jarima zarbasidan ajoyib gol urib, shuhrat qozongan va endi Chempionlar ligasida o‘zini ko‘rsatishga tayyor. “Chelsi” 19 yoshli himoyachi, “Ayaks”ning sobiq sardori Yorrel Xatoga umid bog‘lamoqda. Uning yetuk o‘yini tengdoshlaridan ajralib turadi.

Hujumda “Monako” hujumchisi Jorj Ilenixena ajralib turadi. U YECHL tarixidagi eng yosh gol mualliflaridan biri bo‘lib, 17 yoshida “Barselona“ga gol urgan. “Real” jamoasida “River Pleyt“dan o‘tib, madridliklar asosiy tarkibiga kirib ulgurgan 18 yoshli argentinalik Franko Mastantuonodan o‘sish kutilmoqda.

Chempionlar Ligasi-2025 finalida gol urgan “PSJ” futbolchisi Senni Mayulu va “Liverpul” tarixidagi eng yosh gol muallifi – atigi 17 yoshli Rio Ngumoxni ham unutmaslik kerak. “Arsenal”da hujumkor yarimhimoyachi Itan Nvaneri, “Sporting“da esa yozda “Chelsi“ga o‘tadigan qanotlarda universal o‘yinchi Jeovani Kuenda rivojlanishda davom etmoqda.

Bu futbolchilar Yevropa futbolining kelajagidir va Chempionlar Ligasi-2025/26 ular uchun sayyoramizning eng nufuzli klublar turnirida o‘zlarini namoyon etish uchun asosiy imkoniyat bo‘ladi.